अभिनेता रणवीर सिंगवर ‘FWICE’ (Federation of Western India Cine Employees) ने घातलेल्या ‘नॉन-कोऑपरेशन’ बंदीमुळे सध्या चित्रपटसृष्टीत मोठी खळबळ उडाली आहे.
सोशल मीडियावर या वादावरून उलटसुलट चर्चा सुरू असतानाच, काही जुन्या आठवणींना उजाळा देत लोक पुन्हा एकदा बॉलीवूड आणि अंडरवर्ल्डच्या कनेक्शनबद्दल बोलू लागले आहेत. आज जरी चित्रपटसृष्टी कॉर्पोरेट पद्धतीने चालत असली, तरी ८० आणि ९० च्या दशकात दाऊद इब्राहिम आणि त्याच्या ‘डी-कंपनी’चा बॉलीवूडवर असलेला विळखा हा भारतीय सिनेमाच्या इतिहासातील सर्वात काळा अध्याय मानला जातो.
- काळ्या पैशाचा पांढरा खेळ
सन २००० पूर्वी भारत सरकारने बॉलीवूडला अधिकृत ‘उद्योग’ म्हणून मान्यता दिली नव्हती. त्यामुळे चित्रपट निर्मात्यांना बँकांकडून कायदेशीर कर्ज मिळत नसे. चित्रपट बनवण्यासाठी करोडो रुपयांच्या रोख रकमेची गरज असायची. याच गोष्टीचा फायदा दाऊद इब्राहिमने घेतला. त्याने स्मगलिंग आणि ड्रग्जच्या माध्यमातून कमावलेला काळा पैसा चित्रपट निर्मितीमध्ये गुंतवून पांढरा करण्यास सुरुवात केली.
- धमकी, खंडणी आणि सक्तीचे कास्टिंग
अंडरवर्ल्डचा पैसा जसा सिनेमात आला, तसा त्यांचा धाकही वाढला. डी-कंपनीचे गुंड केवळ चित्रपट फायनान्स करत नव्हते, तर ते दिग्दर्शकांना धमकावून त्यांच्या आवडीच्या कलाकारांना चित्रपटात घेण्यास भाग पाडत असत. दुबईत बसून दाऊद आणि त्याचे हस्तक (जसे की अबु सालेम आणि छोटा शकील) बड्या स्टार्सना धमकावून त्यांच्या तारखा आणि परदेशातील सिनेमा वितरणाचे हक्क जबरदस्तीने हिसकावून घेत. ज्यांनी याला विरोध केला, त्यांना मोठी किंमत मोजावी लागली. टी-सीरिजचे मालक गुलशन कुमार यांची १९९७ मध्ये झालेली हत्या आणि राकेश रोशन यांच्यावर झालेला हल्ला याच भीतीचे जिवंत पुरावे होते.
- शारजाह आणि दुबईतील पार्ट्या
त्या काळात दुबई आणि शारजाहमधील क्रिकेट मॅचेस किंवा दाऊदच्या आलिशान पार्ट्यांमध्ये बॉलीवूडचे अनेक बडे स्टार्स हजेरी लावत असत. मुंबईत आपले चित्रपट आणि स्वतःचा जीव सुरक्षित ठेवण्यासाठी अनेक कलाकारांना अंडरवर्ल्डशी जुळवून घेणे भाग पडायचे.
- संबंध कसे तुटले?
१९९३ च्या मुंबई बॉम्बस्फोटानंतर दाऊद इब्राहिम देशाचा सर्वात मोठा शत्रू बनला. त्यानंतर मुंबई पोलिसांनी अंडरवर्ल्ड आणि बॉलीवूडच्या या नेक्ससवर कडक कारवाई सुरू केली. अनेक कलाकारांची चौकशी झाली आणि काहींना तुरुंगातही जावे लागले. पुढे २००० मध्ये बॉलीवूडला मिळालेला ‘इंडस्ट्री स्टेटस’चा दर्जा आणि कॉर्पोरेट कंपन्यांची एन्ट्री यामुळे दाऊदच्या काळ्या पैशाची गरज संपली आणि हा विळखा सैल झाला.
या संपूर्ण वादाला आणि दाऊदच्या कनेक्शनच्या चर्चेला हवा मिळण्याचे ताजे कारण म्हणजे नुकताच रिलीज झालेला रणवीर सिंगचा ब्लॉकबस्टर चित्रपट ‘धुरंधर: द रिव्हेंज’ चित्रपटात दाखवल्याप्रमाणे ‘बडे साब’ खरोखरच पडद्यामागून बॉलीवूडमध्ये परत आले आहेत का?
रणवीर सिंगवरील FWICE ची बंदी आणि ‘धुरंधर’ या दोन्ही गोष्टी एकाच वेळी आल्यामुळे अंडरवर्ल्डचे ते काळे दिवस पुन्हा तर येणार नाहीत ना, अशी भीती आता बोलून दाखवली जात आहे.
About The Author
