दात पिवळे पडलेयत? मग करा “हा” उपाय

हसतमुख चेहरा प्रत्येकासाठी महत्त्वाचा असतो. खरं तर, हसू हेच चेहऱ्याचं खरं सौंदर्य वाढवणारं वैशिष्ट्य आहे. मात्र दात पिवळे दिसत असतील तर हसताना नकळत संकोच जाणवू शकतो. अलिकडे बदललेल्या जीवनशैलीमुळे लोकांना चहा, कॉफी, तंबाखू, धुम्रपान किंवा जास्त साखरयुक्त पदार्थ खाण्याची सवय असते. यामुळे दातांवर पिवळसर थर बसतो. नियमित ब्रश करूनही दात चमकत नाहीत. म्हणूनच अनेक जण दात पांढरे आणि चमकदार करण्यासाठी वेगवेगळ्या टूथपेस्ट्स किंवा महागडे डेंटल ट्रीटमेंट्स वापरतात. पण तुम्हाला माहीत आहे का, आपल्या घरच्या स्वयंपाकघरात सहज मिळणारे मीठ आणि लिंबू व आणखी काही पदार्थ दातांवरील पिवळसर थर काढून टाकण्यात तितकेच प्रभावी ठरू शकतात?

पूर्वीच्या काळी जेव्हा टूथपेस्ट ब्रश सारखे प्रकार नव्हते. तेव्हा कडूलिंबाच्या झाडाचे खोड वापरून दात घासले जात असत. त्याच बरोबर आणखी काही घरगुती वापरले जात होते. त्यापैकीच एक म्हणजे मीठ आणि लिंबू. मीठामध्ये एक क्लिनिंग एजंट असतो. जो दातांवरील प्लाक आणि पिवळाथर काढून टाकण्यास मदत करतो. लिंबातील सायट्रिक अॅसिड दातांलवरील घाण आणि डाग साफ करतो. ज्यामुळे दात पांढरे शुभ्र होण्यास मदत होते.

जुन्या काळापासून वापरला जाणारा हा उपाय अजूनही प्रभावी आहे. यासोबतच जर मोहरीच्या तेलात मीठ मिसळून हलक्या हाताने दातांवर चोळल्यास दातांवरचा पिवळसरपणा कमी होऊन हिरड्या मजबूत व्हायला मदत होते.

तिसरा उपाय म्हणजे स्ट्रॉबेरी पल्प. यामध्ये असलेले मॅलिक अॅसिड दातांवरील डाग काढण्यास मदत करते. पिकलेल्या स्ट्रॉबेरीचा गर दातांवर लावून 5 मिनिटांनी ब्रश केल्यास एका आठवड्यानंतर तुम्हाला त्याचा परिणाम जाणवू लागेल. या सगळ्यासोबतच आहारामध्ये फळे आणि भाज्यांचा जास्तीत जास्त वापर करावा. सफरचंद, गाजर, काकडी यांसारख्या कुरकुरीत फळ भाज्या खाल्ल्याने दात स्वच्छ राहतात आणि पिवळसरपणा कमी होईल.