अगरबत्ती लावतायं… सावधान! सिगारेटपेक्षाही हानिकारक आहे अगरबत्तीचा धूर

भारतीय संस्कृतीत अगरबत्ती म्हणजे पुजाविधीतील एक अविभाज्य घटक मानला जातो. प्रत्येक मंदिरात, घरात किंवा धार्मिक कार्यात अगरबत्तीचा वापर अगदी सहज दिसून येतो. पूर्वीच्या काळी धूपाची अगरबत्ती अथवा उदबत्ती बनवली जात असे. यामागे नाकावाटे धूप शरीरात गेल्यास त्याचे औषधी परिणामांमुळे शरीरसुद्धा निरोगी राहण्यास मदत होत असे. धूप लावल्याने त्याचा सुगंध मनाला शांतता देतो, आणि वातावरणात सकारात्मकता निर्माण करतो. परंतू अलिकडे बाजारात मिळणाऱ्या अगरबत्त्यांमध्ये अनेक रसायने मिसळलेली असतात.

अगरबत्तीच्या या सुगंधासोबत येणारा धूर मात्र आरोग्यासाठी धोकादायक ठरू शकतो. साउथ चायना युनिव्हर्सिटी ऑफ टेक्नॉलॉजी आणि चायना टोबॅको ग्वांगडोंग इंडस रेल्वे कंपनी यांच्या संयुक्त अभ्यासातून एक धक्कादायक बाब समोर आली आहे. त्यांनी दिलेल्या अहवालानुसार अगरबत्तीचा धूर सिगारेटच्या धुरापेक्षा अधिक हानिकारक ठरू शकतो असे सांगितले जात आहे.

या रिसर्चमध्ये अगरबत्ती आणि सिगारेटच्या धुराची तुलना करण्यात आली. यामध्ये अगरबत्तीच्या धुरात तब्बल 99 टक्के अतिसूक्ष्म कण आढळतात जे शरीरासाठी अत्यंत घातक आहेत. हे कण हवेत मिसळून आपल्या श्वसनाद्वारे शरीरात प्रवेश करतात आणि शरिरातील पेशींवर परिणाम करतात.

अगरबत्तीतून निघणाऱ्या धूरात म्युटेजेनिक, सायटोटॉक्सिक आणि जीनोटॉक्सिक आढळून आले आहे. हे पदार्थ थेट आपल्या फुफ्फुसांवर परिणाम करतात. त्यांच्यामुळे फुफ्फुसातील पेशींमध्ये बदल होतो, जळजळ होते यामुळे फुफ्फुसांचा कर्करोग होण्याची शक्यता असते. याबरोबरच या धुरातील रसायनांमुळे डोळ्यांवर देखील परिणाम होऊ शकतो. डोळ्यांमध्ये खाज, जळजळ आणि दृष्टी कमी होणे यांसारख्या समस्या निर्माण होण्याची शक्यता असते.