C. P. Radhakrishnan: महाराष्ट्राचे राज्यपाल झाले देशाचे नवे उपराष्ट्रपती

देशाचे नवे उपराष्ट्रपती कोण होणार याकडे संपूर्ण देशाचे लक्ष लागले होते. मंगळवार दि. 9 सप्टेंबर रोजी झालेल्या निवडणुकीची मतमोजणी संध्याकाळी 6 वाजल्यापासून सुरू झाली. या निवडणुकीत एकूण 788 मतदारांपैकी 7 जागा रिक्त असल्याने प्रभावी मतदार संख्या 781 होती. त्यापैकी 768 खासदारांनी मतदान केले तर 13 खासदार अनुपस्थित होते. अनुपस्थितांमध्ये BRS चे 4, BJD चे 7, अकाली दलाचा 1 आणि एका अपक्ष खासदाराचा समावेश होता.

या निवडणुकीत NDA कडून तमिळनाडूतील ज्येष्ठ भाजप नेते आणि माजी राज्यपाल सी. पी. राधाकृष्णन हे उमेदवार होते, तर INDIA आघाडीकडून माजी सर्वोच्च न्यायालयाचे न्यायमूर्ती बी. सुधर्शन रेड्डी यांना उमेदवारी देण्यात आली होती. मतदानाच्या आकडेवारीवरून NDA उमेदवार राधाकृष्णन यांना स्पष्ट आघाडी मिळण्याची शक्यता व्यक्त केली जात होती. NDA कडे लोकसभेत व राज्यसभेत मिळून मजबूत संख्याबळ असल्याने त्यांचा विजय जवळपास निश्चित मानला जात होता आणि ही शक्यता खरी ठरली.

सी. पी. राधाकृष्णन महाराष्ट्राचे राज्यपाल म्हणून कार्यरत होते. आता लवकरच उपराष्ट्रपती पदाची धुरा त्यांच्या हाती जाणार आहे. भारताचा उपराष्ट्रपती हा राज्यसभेचा सभापती म्हणूनही काम करतो. त्यामुळे या निवडणुकीचे राजकीय महत्त्व मोठे आहे. संसदेतील पुढील सत्रांमध्ये सरकार आणि विरोधकांमध्ये होणारा संघर्ष हाताळण्याची जबाबदारी नव्या उपराष्ट्रपतींकडे असेल.