अमेरिकेचे राष्ट्राध्यक्ष डोनाल्ड ट्रम्प प्रशासनाने H-1B व्हिसाच्या शुल्कात वाढ करण्याची घोषणा केल्यानंतर भारतीय शेअर बाजारात सोमवारी मोठी घसरण नोंदवली गेली. या निर्णयाचा थेट फटका आयटी कंपन्यांच्या शेअर्सना बसल्यामुळे बाजारात विक्रीचा दबाव वाढला आणि दोन्ही प्रमुख निर्देशांक खाली आले.
सेन्सेक्स-निफ्टीमध्ये मोठी घसरण
व्यापाराच्या अखेरीस निफ्टी 50 हा 125 अंकांनी म्हणजेच 0.49% घसरून 25,202 अंकांवर बंद झाला. सेन्सेक्स 466 अंकांनी किंवा 0.56% घसरत 82,160 अंकांवर स्थिरावला. निफ्टी बँक निर्देशांकात देखील 174 अंकांची (0.49%) घसरण होऊन तो 55,285 अंकांवर आला.
स्मॉलकॅप आणि मिडकॅप शेअर्समध्ये मिश्र स्थिती दिसली. बीएसई मिडकॅप 366 अंकांनी (0.78%) घसरून 46,501 वर पोहोचला, तर बीएसई स्मॉलकॅप 388 अंकांनी (0.71%) वाढत 54,233.63 वर बंद झाला.
दिवसाच्या ट्रेडिंगमध्ये एकूण 3,205 शेअर्सपैकी 1,186 शेअर्समध्ये वाढ झाली, तर 1,920 शेअर्स घसरले आणि 99 शेअर्समध्ये कोणताही बदल झाला नाही. यामध्ये 107 शेअर्सनी त्यांचा 52 आठवड्यांचा उच्चांक गाठला, तर 53 शेअर्सनी नीचांकी पातळी गाठली.
आयटी क्षेत्रात सर्वाधिक फटका टेक महिंद्राला बसला. या शेअरमध्ये तब्बल 3% घसरण झाली. त्याचप्रमाणे टाटा कन्सल्टन्सी सर्व्हिसेस (TCS), इन्फोसिस, सिप्ला, विप्रो आणि इतर अनेक आयटी कंपन्यांच्या शेअर्समध्येही मोठी घट पाहायला मिळाली.
यावेळी घसरणीच्या सत्रातही काही शेअर्सनी मजबूत कामगिरी केली. निफ्टी 50 मध्ये अदाणी एंटरप्रायझेस सर्वाधिक वाढीसह 3.98% वर बंद झाला. झोमॅटो, बजाज फायनान्स, अदाणी पोर्ट्स अँड एसईझेड आणि अल्ट्राटेक सिमेंट हेही टॉप गेनर्स ठरले.
विशेषज्ञांच्या मते, H-1B व्हिसा शुल्कवाढ भारतीय आयटी कंपन्यांच्या परदेशी कामगिरीसाठी अतिरिक्त खर्च निर्माण करेल. यामुळे अल्पकालीन काळात आयटी शेअर्सवर दबाव कायम राहण्याची शक्यता आहे. गुंतवणूकदारांनी येत्या काही दिवसांत बाजारातील जागतिक संकेतांवर लक्ष ठेवणे गरजेचे असल्याचे तज्ज्ञांचे म्हणणे आहे.
