कोकणातील किनाऱ्यालगत वसलेल गणपतीपुळे हे महाराष्ट्रातील प्रमुख आणि प्रसिद्ध देवस्थान आहे. दाक्षिणात्य भागांत काही मंदिरांमध्ये देवदर्शना करीता केवळ पारंपारिक पोशाख घातल्यास दर्शन घेण्याची परवानगी आहे. अशाच प्रकारे आता गणपतीपुळे या मंदिरात देखील ड्रेस कोड लागू करण्यात आला आहे. मंदिर प्रशासनाच्या मते, हे पाऊल मंदिराची पवित्रता आणि पारंपारिक वातावरण राखण्यासाठी उचलण्यात आले आहे.
ड्रेस कोडमध्ये काय आहे?
नवीन नियमांनुसार, मंदिर परिसरात प्रवेश करताना भाविकांनी पारंपरिक आणि सभ्य पोशाख परिधान करणे आवश्यक आहे. पुरुषांनी लुंगी, धोतर, कुर्ता किंवा पायजमा वापरावा, तर महिलांनी साडी, सलवार-कुर्ता किंवा इतर पारंपरिक पोशाख घालावा. जीन्स, शॉर्ट्स, टी-शर्ट, स्लीव्हलेस कपडे आणि अति पाश्चात्य वेशभूषा करून येणाऱ्या भाविकांना मंदिरात प्रवेश नाकारला जाईल.
मंदिर विश्वस्त मंडळाचे म्हणणे आहे की, अलीकडच्या काळात काही पर्यटक मंदिरात बीचवेअर किंवा अयोग्य कपड्यांमध्ये प्रवेश करत होते, ज्यामुळे धार्मिक वातावरणावर परिणाम होत होता. भाविकांच्या भावना आणि मंदिराचा सन्मान राखण्यासाठी ड्रेस कोड लागू करण्यात आला आहे. हा नियम सर्वांसाठी समानपणे लागू असेल आणि त्याचे पालन मंदिर कर्मचारी सुनिश्चित करतील.
भाविकांची प्रतिक्रिया
ड्रेस कोडबाबत भाविकांमध्ये संमिश्र प्रतिक्रिया दिसून येत आहे. अनेक भक्त याचे स्वागत करत आहेत, कारण त्यामुळे मंदिराचा धार्मिक आणि सांस्कृतिक वारसा जपला जाईल, असे त्यांचे म्हणणे आहे. काही पर्यटक मात्र अचानक लागू झालेल्या या नियमांबद्दल संभ्रम व्यक्त करत आहेत.
पर्यटकांसाठी सूचना
मंदिर प्रशासनाने पर्यटकांना कळवले आहे की, मंदिर दर्शनासाठी पारंपरिक पोशाख बाळगावा. ज्यांच्याकडे योग्य पोशाख नसेल, त्यांच्यासाठी मंदिर परिसरात भाड्याने किंवा विक्रीसाठी पारंपरिक वस्त्रांची सोय करण्यात येणार आहे. गणपतीपुळे मंदिर हे केवळ धार्मिक केंद्र नसून कोकणातील पर्यटनाचाही महत्त्वाचा भाग आहे. अशा निर्णयामुळे येथील सांस्कृतिक वातावरण अधिक सुदृढ होईल, असा विश्वास प्रशासनाने व्यक्त केला आहे.
About The Author
